Влијателен руски воен блогер е уапсен во Црна Гора под сомнение дека се обидел да ја дестабилизира земјата, соопштија официјални лица.

Михаил Звинчук, кој претходно работел во прес-службата на руското министерство за одбрана, е основач на телеграм каналот „Рибар“, кој има повеќе од 1,5 милиони следбеници и силно ја поддржува руската инвазија врз Украина.

„Звинчук е приведен денеска во успешна операција. Нашите институции си ја вршат работата, Црна Гора ги штити своите интереси и никој нема да ја загрози нашата европска иднина. Предупредувавме дека обидите за поткопување и дестабилизација на Црна Гора преку хибридни активности постојано го следат нашиот европски пат“, изјави Милојко Спајиќ, премиерот на Црна Гора, која некогаш беше сојузник на Москва, а сега е членка на НАТО и е блиску до членство во Европска Унија.

Според медиумските извештаи, Звинчук бил приведен во крајбрежниот град Рисан, заедно со сопругата и уште три лица.

Во соопштение објавено на каналот „Рибар“ се наведува дека групата планирала да снима манастир, за што претходно ги известила надлежните органи. Засега нема дополнителни детали за случајот, а црногорската полиција сè уште нема дадено коментар.

Портпаролот на Кремљ, Дмитри Песков, изјави дека руските дипломати ќе ја утврдат причината за апсењето на Звинчук и останатите и ќе помогнат во заштитата на нивните права. Портпаролката на руското министерство за надворешни работи, Марија Захарова, соопшти дека руската амбасада во Црна Гора го разгледува случајот.

Звинчук е еден од најпопуларните руски воени блогери. По пристигнувањето во Црна Гора, тој објави видео во кое вели дека влегол во земјата, и покрај тоа што е под европските санкции.