Најстарите остатоци од брод во светот се откриени покрај брегот на Турција, велат археолозите. Тие датираат од пред 4.400-4.700 години, што е рана бронзена доба и е приближно исто време кога се градела Големата пирамида.

Дрвената структура на бродот не е зачувана, но на морското дно се најдени керамички садови што ги носел и некои сè уште содржат траги од она што го имало во нив. Археолозите кои го пронашле бродот велат дека бил долг околу 10 метри и дека бил трговски брод што превезувал товар по Средоземното Море.

„Овие остатоци се временска капсула на дното на морето“, рече Хакан Ониз од Универзитетот Акдениз во Турција, кој ја предводеше експедицијата на Медитеранската археолошка асоцијација.

Тие се најдени близу островот Кекова во Анталија. Артефактите лежат расфрлани на дното само 30 метри под брановите. Пронајдени се три големи камени сидра и повеќе од 30 керамички садови за складирање или амфори.

Ониз рече дека дизајнот на амфорите се совпаѓа со оние ископани во Египет и на Блискиот Исток, за кои се знае дека се стари 4.400-4.700 години.

„Споредувајќи ги техниките на декорација, дефинитивно можеме да кажеме дека нашиот брод е од раното бронзено време. Ова е 100%“, изјави Ониз.

Ова откритие фрла светлина врз трговијата во античкиот свет. Археолозите веруваат дека бродот го започнал своето патување некаде долж источниот брег на Средоземното Море и дека носел стока или во античкиот град Троја во денешна северозападна Турција или до минојскиот народ на Крит.