Две големи аналитички фирми велат дека имаат солидни разузнавачки информации што укажуваат дека група поддржана од Северна Кореја го извршила хакирањето на „Бајнанс“, најголемата светска берза за криптовалути, при што биле украдени 6,3 милијарди долари. „ТРМ Лабс“ и „Чејналисис“ со голема сигурност како извршител ја идентификувале „Лазарус груп“, севернокорејска хакерска мрежа позната и како „Трејдер трејтор“.

„Лазарус“ првпат се прислави во 2014 година, кога беше обвинета за хакирање на филмското студио „Сони“ како одмазда за филмот „Интервју“, во кој се исмеваше севернокорејскиот лидер Ким Џонг Ун.

Експертите ја обвинуваат владата на Ким Џонг Ун дека се потпира на сајберкриминал за да се финансира, што Пјонгјанг долго време го негира. Минатата година, ФБИ соопшти дека Северна Кореја била одговорна и за кражбата на 1,5 милијарди долари на крипто берзата „Бајбит“.

ФБИ ја обвини Северна Кореја за сајберкриминал и за кражба на виртуелни средства. Според извештаите, земјата систематски ги развива своите сајбероперации, регрутирајќи ги најперспективните студенти од универзитетите и насочувајќи ги кон хакерски групи надгледувани од разузнавачката агенција на Северна Кореја.

Голем дел од нејзината хакерска активност е насочена кон финансиска добивка. Севернокорејските хакери се осомничени и за кражба на криптовалути во вредност од 620 милиони долари во 2022.

Ако обвинувањата се точни, рекордниот грабеж на „Бајнанс“ покажува колку моќни станале севернокорејските хакери. Експертите велат дека подемот на вештачката интелигенција им дал на хакерите нови начини за извршување криминал.