Претседателот на иранскиот парламент Мохамед Багер Калибаф, клучен преговарач во разговорите помеѓу САД и Иран, изјави дека Американците гласале против војната, што Доналд Трамп ја почна пред повеќе од девет месеци и не може да ја заврши.

„Совест или трошоци за живот, Американците рекоа ‘не‘ на војната и ние ја поддржуваме оваа порака. Ако владата на САД ја предаде волјата на својот народ за да им служи на меѓународните благајници и уценувачи, ќе научи дека нашето ‘не‘ доаѓа со кошмар“, изјави Калибаф.

Откако стана јасно дека Републиканците ја изгубиле контролата во двата дома на Конгресот, Доналд Трамп призна дека војната во Иран имала влијание врз изборите, но најави нови напади.

„Мораме да направиме нешто крупно. Тоа би можело да вклучува силен удар. Тие никогаш нема да имаат нуклеарно оружје“, кажа Трамп, нагласувајќи дека „конфликтот ќе заврши кога јас ќе кажам дека ќе заврши“.

Во последните недели, Трамп предупредуваше дека САД и Израел би можеле да се вратат во тотална војна по меѓуизборите ако не може да се постигне договор со Иран.

Кина реагираше претпазливо на убедливата победа на демократите на изборите во САД, опишувајќи го гласањето како внатрешно прашање за земјата. Портпаролката на министерството за надворешни работи Мао Нинг изјави дека Кина е подготвена да соработува со САД на спроведувањето на договорите постигнати помеѓу лидерите на двете земји, зајакнувањето на комуникацијата и соодветното управување со разликите.