Продуцентите на најдолговечната анимирана серија на сите времиња „Симпсонови“ му врачија отказ на композиторот Алф Клаусен по 27 години соработка.

Почнувајќи од сезоната 1990/91, Клаусен збогати над 560 епизоди со своите пародични, оркестарски музички парчиња, кои од авторот Мет Гренинг беа опишани како „тајното оружје“ на серијата. За да ги создаде своите мелодии, тој секоја недела користеше 35-член оркестар, што серијата ја чинеше милиони долари годишно.

Продуцентите сега решиле дека на серијата и треба поинаков тип на музика, но се смета дека отказот за Клаусен е дел од стратегијата за намалување на трошоците.

За својата работа на “Симпсонови“, Клаусен освои две награди „Еми“ и имаше уште 21 номинација, со што е најноминираниот композитор во историјата на оваа престижна ТВ-награда.