Претседателот Ѓорге Иванов ги предложи Дарко Костадиновски и Осман Кадриу за нови судии на Уставниот суд на Република Македонија, објави државната агенција МИА.

Согласно неговите овластувања, тој ги доставил предлозите за двајца нови судии до Собранието.

Дарко Костадиновски е доктор на правни науки од областа на меѓународното право и во последните 16 години ја извршуваше функцијата советник за надворешна политика во кабинетот на претседателот на Република Македонија.

Д-р Осман Кадриу доаѓа од академската заедница како професор на Факултетот за правни науки на ФОН, а зад него е и долгогодишен стаж во Општинскиот суд во Кичево и во Републичкиот судски совет.

Тие треба да ги заменат Наташа Габер-Дамјановска и Гзиме Старова, на кои мандатот им истече минатиот месец.