„Охридска банка Сосиете женерал“, во соработка со „Солвео“, го организира првиот OBSG BUZZ хакатон, чија цел е креирање на мобилна банка од иднината.

Целта на овој 54-часовен предизвик, кој ќе се одржи од 30 ноември до 2 декември на Факултетот за електротехника и информациски технологии во Скопје, е да се пронајдат и креираат нови начини на интеракција на банката со корисниците.

Поделени во тимови од најмногу пет члена, формирани од „Солвео“, 50 млади и талентирани умови ќе имаат можност да работат на создавање иновативно и применливо решение, со кое ќе ја креираат мобилната банка од иднината. Победничкиот тим ќе однесе награда од 1.500 евра.

Краен рок за пријавување е 25 ноември, а можат да се пријават сите кои имаат искуство во дизајн, маркетинг, програмирање, бизнис и финансии.