Советот на Општина Велес го усвои Планот за одржлива урбана мобилност, кој нуди применливи решенија за сообраќајот и за сообраќајната инфраструктура во Велес.

Со усвојувањето и примената на мерките од овој документ, Велес е прва општина во Македонија со подготвен план изработен според стандардите на ЕУ. Планот е насловен „Градот да биде добар за нашите деца“.

„Мирно донесовме револуционерни мерки за подобра сообраќајна иднина во градот. Со планот, кој е работен според примерот на Љубљана, предност имаат пешаците, велосипедистите, јавниот превоз на еколошки горива и на крај се автомобилите“, рече градоначалникот Аце Коцевски.

Јован Христоски, претставникот на словенечката компанија АПИА, која го изработи овој значаен документ вреден три милиони денари, ги презентираше клучните препораки и мерки од планот. Тој предвидува зонско паркирање, затворање на центарот на градот за сообраќај, развој на јавниот превоз, изградба на мост на Вардар кај Речани, развој на велосипедизмот и велосипедската инфраструктура, инфраструктура за лицата со ограничена мобилност и воведување еднонасочен сообраќај на најкритичните места во високите делови на градот кон црквите „Св. Спас“ и „Св. Пантелејмон“.

Планот е ‘тивка револуција‘ за да се сменат навиките на граѓаните. Според извршената анкета во која учествуваа 4.500 граѓани на Велес, 53% користат автомобил, 29% пешачат, седум отсто користат јавен превоз и само еден отсто велосипед“, кажа Христоски.

П. ПЕЧКОВ