Министерот за одбрана на Саудиска Арабија изложи остатоци од дронови и проектили за кои вели дека ја докажуваат вмешаноста на Иран во нападите на нејзините два нафтени погона изминатиот викенд.

Тој кажа дека 18 дронови и седум проектили биле лансирани од насока која го исклучува Јемен, иако хутските бунтовници, кои се поддржани од Техеран, тврдат дека тие ги извеле нападите.

Иран уште еднаш ги демантираше обвинувањата и се закани дека ќе возврати на секоја воена акција.

„Овие остатоци покажуваат дека нападите биле лансирани од северот и без сомнение се спонзорирани од Иран. Податоците што ги издвоивме од компјутерите на едно од беспилотните летала покажуваат дека тоа е иранско. Засега сѐ уште работиме на тоа да ја утврдиме точната точка на лансирањето“, изјави министерот Турки ал-Малики.

Според него, 18 дронови го гаѓале нафтениот погон во Абкаик, а биле истрелани и седум проектили, од кои четири го погодиле нафтеното поле во Кураис.

Во исто време, Доналд Трамп изјави дека наредил да се засилат санкциите кон Иран.