Момче на 21 година загина во сообраќајката на патот кон село Чичево, Градско, а на скопксите клиники пренесени се две момчиња во животнозагрозувачка состојба и едно со тешки повреди. Сообраќајката се случила кога автомобилот со четирите жители од Градско и Ногаевци се враќал по полноќ од славата на манастирот во село Чичево. Тројцата сопатници од автомобилот биле надвор од него, а единстено возачот бил внатре и била побарана помош од пожарникарите за да се извади од возилото.
„Побарана е помош поради сообраќајка, испратени се две амбулантни возила, дадена неопходна нега и сите четворица повредени се пренесени во Ургентниот центар во Велешка болница“, кажа д-р Славица Нешова-Пановска од Службата за Итна помош при Здравствен дом Велес.
Д-р Ванчо Граматов од Велешката болница кажа дека кога биле донесени четворицата од сообраќајката, едниот бил починат.
„Двете лица се во животнозагрозувачка состојба, дадена е неопходна помош и пренесени на КАРИЛ во Скопје, четвртото лице е со со тешки телесни повреди е пренесено на Клиничкиот центар ‘Мајка Тереза’ во Скопје“, рече д-р Граматов.
Од велешката полиција соопштија дека сообраќајката е пријавена ноќеска десетина минути по полноќ.
„Во СВР Велес е пријавено дека на локалниот пат с. Горно Чичево – с. Долно Чичево, Општина Градско, патничко возило „бмв“ со велешки регистарски ознаки управувано од П. А. (22) од Градско, излетало надвор од коловозот. Во несреќата со тешки телесни повреди се здобиле возачот и неговите сопатници Љ. О. (21 ), Б. П. (20), двајцата од Градско, и Х. Л. (22) од с. Ногаевци, Општина Градско, констатирани во Општата болница Велес. Од здобиените повреди, од страна на лекар констатирана била смрт кај Љ. О.“, соопшти портпаролката на СВР Велес Биљана Ѓаковска.
Од Основното јавно обвинителство (ОЈО) Велес соопштија дека автомобилот е предаден на вонреден технички преглед, телото на починатото момче е дадено на обдукција, од трите лица се зема крв и урина за утврдување на присуство на алкохол, додека од возилото од воланот се земени папиларни отисоци, за да се утврди кој го возел.
П. ПЕЧКОВ
