Клиничката болница во Битола кадровски се зајакнува со 34 нови трајни вработувања кои ќе бидат реализирани до крајот на оваа година.
„Меѓу овие 34 нови вработувања се здравствени работници, администрација и помошно- технички персонал. Со тоа се зајакнува кадарот во Болницата кој се состои од 750 вработени на неопределено време“, рече министерот за здравство Фатмир Меџити кој денес присуствуваше на предавањето на донацијата вредна скоро половина милион долари во медицинска и немедицинска опрема на Болницата од страна на невладината организација World Medical Relief, како и Обединета македонска дијаспора.
Меџити најави дека до петок ќе се знае и колку од лицата што се со години на договор на дело во македонското здравство ќе бидат вработени.
„Секој вторник војуваме во Влада за да издвоиме вработувања зашто здравството и пациентите се пред сѐ. Изминатите две недели имавме жолчна расправа во Влада успеавме да ги убедиме сите. Утре имаме онлајн седница и тие договорни на дело што се по 4 до 10 години ќе се вработат трајно. Ќе одлучиме утре, ги усогласување бројките со министерство за финансии и Фондот за здравство осигурување и до петок ќе имаме конкретно решение“, рече Меџити.
Во текот на изминатата година Болницата имаше два трагични случаи со смртта на петгодишната Јана и мртвороденото бебе, но министерот најави дека даваат сѐ од себе за да ја вратат довербата кај пациентите.
„Се стремиме тоа што зависи од нас колку што е можно да не се случуваат вакви случаи. Не само натписот Клиничка болница Битола, туку натаму со директорката и здравствените работни и ќе се стремиме и кадровски и професионално да го заслужи тој натпис. Заедно ќе работиме напорно и макотрпно“, рече министерот.
Директорката Елизабета Ивановска изјави дека имаат набавено и нова опрема плазма стерилизатор, нов апарат за анестезија, за неинвазивна респираторна поддршка , донација уретрореноскоп и друго.
Донацијата што денес пристигна се состоеше од апарат за стерилизација, ортопедски помагала, болнички кревети , медицински столови, инхалатори, апарати за мерење притисок како и разни инструменти и друга опрема.
Ж. ЗДРАВКОВСКА
