Националната установа (НУ) „Стоби“ доби 6.100.000 денари (сто илјади евра) за шест проекти од годишната програма на Министерството за култура за 2025 година. Лани оваа установа за работа доби 3,75 милиони денари (60.000 евра) за 12 проекти.
„Лани установата доби најмалку финансиска поддршка откако постои од 2008. Овде имаме објекти кои заслужуваат многу внимание и бараат многу средства за работа за да можат соодветно да бидат презентирани. Театарот го работиме од 2014 и секоја година средствата се намалуваат, па лани колегите работеа таму само 10-15 дена. Уште еден објект, кој е единствен на Балканот, градбата со арки со фантастична ѕидна и подна декорација тотално е запоставен. Оваа година фокусот ќе биде на него“, кажа директорката Силвана Блажевска пред распределата на средствата.
Годинава, „Стоби“ од областа на недвижното културно наследство доби 1.300.000 денари за тековно одржување и партерно уредување на археолошкиот локалитет, по 2.000.000 денари за конзервација, реставрација и археолошки доистражувања на Градбата со арки и за конзервација, реставрација и реконструкција и археолошки доистражувања на објект Римски театар. Од областа на музеjска деjност и заштита на нематеријално културно наследство, „Стоби“ доби 100.000 денари за реализациjа на Основен проект за конзервација и реставрациjа на керамика и стакло од нивната збирка.
За изработка на анекс на Основен проект за конзервација, реставрациjа, конструктивно зајакнување на објектот Стара железничка станица и негова адаптација во Центар за посетители добиени се 500.000 денари.
Министерот за култура и туризам Зоран Љутков најави зголемување на средствата за работа, но постепено.
„Многу е тешко кога со години опаѓале средствата за капитални инвестиции и проекти, за една година да се вратат на старите позиции. Театарот требаше да биде приоритет во санацијата и конзервацијата. Не само поради локалитетот, туку и од комерцијална причина. Таму со години се одржуваше театарскиот фестивал на античка драма Стоби. Годинава ќе имаме преоден буџет, но од 2026 очекувам сериозно зголемување на средствата за работа на Стоби“, кажа Љутков при неодамнешната посета на археолошкиот локалитет.
П. ПЕЧКОВ
