Битолчани вечерва го фрлија ѓубрето пред влезната врата на Општина Битола, искажувајќи револт против изградба на регионална депонија. Тие на протестот се појавија носејќи црни вреќи со ѓубре, кои потоа ги оставија пред општинската зграда.
„По цена на нашите животи нема да дозволиме формирање регионална депонија, која покрај РЕК Битола ќе стане не еколопка, туку нуклеарна бомба“, рекоа битолчани на мегафон, а потоа продолжија по Широк Сокак, со цел да информираат за проблемот што повеќе битолчани и да ги повикаат на протестите кои ќе се одржуваат секоја среда.
Тие бараат промена на локацијата каде смет ќе депонираат 18 општини од Пелагонискиот и Југозападниот Регион зашто сметаат дека Битола е доволно загадена од РЕК, па во близина не ѝ треба и регионална депонија.
„Депонијата во Новаци ќе има капацитет од 37.522 тони ѓубре на годишно ниво. Шеесет товарни камиони секој ден ќе врват низ Битола“, рече Верче Јаковиќ.
„Со оваа депонија нам ни се намалува вредноста на имотите. Не ќе можеме ниедна куќа, ниту стан да продадеме. Кој ќе дојде да купи стан од 1.200 евра за квадратен метар или куќа од 200.000 евра покрај депонија, покрај РЕК“, рече една битолчанка која се обрати пред присутните.
Учесниците на протестот почнаа да собираат потписи за стопирање на планираната изградба на депонијата.
„Потписи ќе се собираат и во Новаци и во Могила. Мислам дека можеме да стигнеме и до 30.000 потписи на регионално ниво и ќе мора да нѐ послушаат, сакале или не. Ќе стигнеме и на државно ниво да го покренеме прашањето“, рече Никола Танчевски.
Советот на Општина Битола исто така има донесено заклучок со кој се бара измена на локацијата за регионална депонија, кој пред една недела беше испратен до Владата.
Претставниците на Министерството за животна средина и просторно планирање на вонредната седница на битолскиот Совет на 12 март изјавија дека новата депонија ќе биде по еколошки стандарди, дека од неа повеќе загадува сегашното ѓубриште во Мегленци и дека проектот е од национален интерес, за кој се обезбедени средства преку заем од Европската банка за обнова и развој.
Ж. ЗДРАВКОВСКА
