Од локалните избори поминаа повеќе од два месеца, а 1.170 членови на избирачките одбори и на Општинската изборна комисија Тетово сè уште ги немаат добиено надоместоците за нивниот ангажман. Причината за ова е блокираната жиро-сметка на Општина Тетово.
„Нашата општина има блокирана жиро-сметка. Двапати испративме допис до Државната изборна комисија да се исплати надоместок на членовите на избирачките одбори и на ОИК. Чекаме службено да нè известат од ДИК“, изјави Назми Даути, претседател на ОИК Тетово.
Вакви проблеми на општинските изборни комисии имало и порано, па решението било барано во Министерството за финансии, кое наоѓало начин да се изврши исплата на овие надоместоци.
„Испративме допис до Министерството за финансии, каде што се објаснува целата ситуација и се бара решение. Сме имале и порано вакви ситуации со други општини и тогаш помагаше Министерството за финансии согласно законските можности“, изјави Адмир Шабани, портпарол на Државната изборна комисија.
За да се исплатат сите 1.170 членови потребни се 12 милиони и 200 илјади денари.
З. АНДОНОВ
