Во скопската Зоолошка градина се родија два пингвина, објави Скопје ЗОО.

„Нашиот пар Џонатан и Лила се родители на две мали пингвинчиња кои се испилија на 23 и на 26 ноември. Пингвините несат по најмногу две јајца, а најчесто преживува само едно, но во Скопје ЗОО со сета грижа успешно се справуваме со овој предизвик веќе трета сезона и ова е трета година како што имаме бебиња, што е голема реткост во поголемиот број зоолошки, но и во природата.

Крвната линија на нашето јато започна од Русија и Италија, а со бебињата кои ги имаме успешно ја продолжуваме одржливоста на видот Хамболт пингвини во Европа и светот“, велат од Зоолошката.

Овие јужноамерикански птици се многу интелигентни и бараат многу внимание и грижа. Најчеста закана за болести е периодот кога има влага и испарување, а во светски рамки и маларијата која ја пренесуваат комарците.

„Затоа просторот околу живеалиштето е целиот посаден со лаванда, а во пештерите каде што живеат пингвините имаат меки гнезда направени од лаванда во кои најмногу уживаат“, велат од Скопје ЗОО.