Јас два пати по четири години лежев во бугарските затвори за македонските права во Бугарија, а сега македонската држава ќе ги впише Бугарите во Уставот, а никаде нема да биде заведено македонското малцинство таму, реагираше Стојан Ѓоргиев, почесен претседател на ОМО „Илинден-Пирин“ од Софија кој присуствуваше на денешната 51. Семакедонска средба во битолското село Трново.
„Ја осудивме Бугарија во Стразбур 14 пати зашто не ги признава нашите права и пак не не` регистрира. Политиката на Бугарија кон Македонците е многу лоша, сакаат да ги бугаризираат Македонците. Гоце Делев, Даме Груев, Јане Сандански се бореле против бугарските врховисти кои сакале Македонија да ја припојат кон Бугарија, а сега во Битола направија клуб ‘Иван Михајлов’, најголемиот убиец на Македонците. Тодор Александров и Ванчо Михајлов не ги почитуваме. Ние Јане Сандански си го знаеме, Гоце Делчев, тоа е Македонија за нас“, рече Ѓоргиев.
Васил Стеријовски од единствената партија на Македонците во Албанија – Македонска алијанса за европска интеграција, обраќајќи се официјално од говорница побара да запрат обидите на Бугарија за негација и асимилација на Македонците во Албанија.
„Тие имаат за цел создавање непостоечко бугарско малцинство на места каде живеат Македонци. Бугарската пропаганда меѓу Македонците во Албанија е иста како за време на Балканските војни и бугарската окупација во Првата светска војна. Албанија мора отворено да каже дека обидите на Софија за асимилација на Македонците во Албанија како Бугари не е добрососедство, туку отворен напад врз суверенитетот и територијалниот интегритет на Албанија и грубо мешање во внатрешните работи на државата “, рече Стеријовски.
Тој од Владата во Тирана побара унапредување на положбата и правата на Македонците таму, со новата територијална организација да не се укинува Општина Пустец, додека областите Гора и Голо Брдо населени со мнозинско македонско население да бидат посебни општини.
На Семакедонската средба беа упатени пораки за зачувување на македонскиот јазик и идентитет, па беше побарано и укинување на договорите со Грција и Бугарија.
Средбата ја благословија отец Пимен, митрополит Европски и архимандритот Никодим Царкњаз од Грција кој рече дека Македонија е „утробата на јазикот на сите словенски народи на што треба да се гордееме и да не го даваме“.
Ж. ЗДРАВКОВСКА
