Европската Унија е најголемиот финансиер во Велес откако сегашниот градоначалник Марко Колев е на оваа функција. Тој изрази благодарност за финансиската помош што ЕУ ја дава за граѓаните.

„ЕУ е најголемиот донатор во Велес во изминатите 16 месеци откако ја извршувам функцијата градоначалник. Тука спаѓаат ‘Европската куќа‘, реконструкцијата на објектот кој треба да биде центар за млади во месноста Дворови и уредувањето на централното градско подрачје и кејот на Вардар, со што наскоро ќе започнеме“, кажа Колев.

Во проектите кои треба да се реализираат е и изградба на пречистителна станица со колекторски систем за отпадните води од Велес, проект кој е заглавен во административните работи, вреден 24 милиони евра, грант од ЕУ.

Во мандатот на претходниот градоначалник Аце Коцевски, ЕУ вложи милион евра за реализацијата на проектот „Паметно езеро Младост“, при што се изградија повеќе содржини. Но, дел од нив не се искористени, како екопаркот и куќи за ноќевање во форма на барик, набавени беа 20 електрични велосипеди кои не се во функција и отворено е туристичко биро во центарот на градот, кое не работи.

П. ПЕЧКОВ