Кога општинските комунални служби не си ја вршат работата за која се платени, тетовци сами преземаат иницијативи за да ги разубават градот и просторот каде што живеат.

Граѓанската иницијатива „Поубоо“ од Тетово покрена акција за чистење, уредување и разубавување на паркот во таканареченото Ајдучко Маало. На социјалните мрежи упатија повик за учество во акцијата, на кој се јавија 15-ина лица. Сивите бетонски патеки и оградниот ѕид се украсија со живописни бои, зелените површини се исчистија од смет и се посадија нови садници цвеќе, со што овој парк заличи на вистинска зелена површина во урбана средина. Акцијата на граѓаните ја помогна и ЈКП „Тетово“, кое со свои возила го собра и однесе собраниот смет.

„Борбата за поубоо маало продолжува. Со овие наши акции сакаме да докажеме дека со малку труд и голема желба можеме да разубавиме секој простор во градот и дека од нас зависи каде ќе живееме“, истакнаа од иницијативата.

Ова е втора акција на граѓанската иницијатива „Поубоо“ за разубавување на градските површини во Тетово, по онаа во паркот во Саат Маало.

З. АНДОНОВ