И бродот „Илинден“ вчера беше изваден од Студенчишкиот канал и е лоциран во близина на охридскиот брег, ама на суво. Акцијата ја изведе Капетанијата, а трошоците за вадење паднаа на товар на сопствениците на бродот.

„Бродот ‘Илинден’ го извади од каналот екипа на Капетанијата. Ангажиран беше и специјален кран која можеше да подигне ваков пловен објект кој е прилично габаритен и тежок. Наскоро ќе извадиме уште неколку стари бродови кои се опасност за екологијата во каналот“, вели Горан Устијаноски, капетанот на Капетанијата на македонските пристаништа.

Овој брод имаше трагична историја. На 5 септември 2009 година во 10:30 часот, „Илинден“ потона со 57 патници, од кои 15 туристи од Република Бугарија го загубија животот.

Д. ЧУБРИЌ