Извршниот комитет на ВМРО-ДПМНЕ на редовна седница едногласно одлучи Стојанчо Радичевски да биде кандидат за градоначалник на Општина Брвеница на претстојните вонредни локални избори. Тој е актуелен претседател на Општинскиот комитет на ВМРО-ДПМНЕ во Брвеница. Стојанчо Радичевски дипломирал на Правниот факултет „Јустинијан Први“ и е магистер по граѓанско право.

Свој кандидат за претстојните вонредни локални избори за градоначалник на Општина Брвеница истакна и Вреди, иако со ВМРО-ДПМНЕ се коалициони партнери во Владата.

Вреди ќе го претставува Јакуп Хусеини, кој исто така е магистер по правни науки и моментално работи како државен службеник во Општина Брвеница.

Вонредните избори за градоначалник на Општина Брвеница доаѓаат откако во јуни оваа година ненадејно почина Јовица Илиевски, кој во ноември 2025 година по вторпат беше избран за градоначалник на Општина Брвеница.

И опозициските партии СДСМ и ДУИ ги објавија имињата на своите кандидати за градоначалник на Брвеница.

СДСМ ќе ја претставува Јовица Радески доаѓа од приватниот сектор, по професија е ветеринар, а политички е ангажиран како актуелен советник во општината и носител на советничката листа на СДСМ.

Демократската унија за интеграција на изборите во Брвеница ќе настапи со Аркин Јахији.

З. АНДОНОВ