По три дена, изгаснат е пожарот во Чучер-Сандево, Скопско. Директорот на Дирекцијата за заштита и спасување (ДЗС) Стојанче Ангелов рече дека на некои места сè уште има чад, но тоа е од трупци кои догоруваат.

„Посериозни пожари кои се гасат од воздух се во Дојран, кај селото Николиќ, кој се гаси со еден хеликоптер на МВР и очекувам тој денеска да биде целосно ставен под контрола и изгаснат. Најсериозен е пожарот над фабриката ‘Самоков‘ во Македонски Брод кој се гаси со ‘ер трактор’ и се надевам дека денеска ќе биде ставен под контрола“, рече Ангелов.

Од Центарот за управување со кризи (ЦУК) соопштија дека до овој момент активни се седум пожари. Покрај  Македонски Брод и  Дојран, пожар има во Општина Чашка под Солунска Глава помеѓу местата викани Изворите на Бабуна и Бабина Дупка, во Општина Бутел кај село Љубанци и во Кавадарци кај Крушевица.