Реизбраниот градоначалник на Штип, Иван Јорданов, на денешната конститутивна седница на Советот на Општина Штип од Изборната комисија го доби уверението за втор мандат. Јорданов (37) беше пратеник во Собранието од 2020 до 2021, кога на локалните избори стана еден од тројцата најмлади градоначалници во Македонија, и тоа уште во првиот круг.

На неодамнешните локални избори Јорданов повторно ја доби довербата на граѓаните и стана првиот штипски градоначалник со втор мандат.

На свечената седница на Советот, Јорданов кажа дека продолжува со интензивната работа за реализација на нови проекти и за завршување на старите кои се во тек, но побара максимална работа и ангажираност и од вработените во локалната самоуправа.

На седницата им беа врачени уверенијата и на 23-цата советници: 16 од ВМРО-ДПМНЕ, четири од СДСМ, два од Левица и еден од ЗНАМ.

И во претходниот состав на Советот ВМРО-ДПМНЕ го имаше апсолутното мнозинство, а новиот состав ја започна својата работа во реновираната сала.

Т. ЈОВАНОВСКИ