Во спортската сала на средното училиште „Перо Наков“, која се наоѓа во кругот на поранешната касарна во населбата Бедиње во Куманово, ќе се врши масовна имунизација против ковид-19 на населението од Североисточниот регион. На овој пункт ќе се вакцинираат жителите на општините Куманово, Липково, Старо Нагоричане, Крива Паланка, Кратово и Ранковце кои се пријавиле на сајтот вакцинација.мк и им стигнала СМС порака или мејл со термин за вакцинација.

„Денеска добивме 4.200 дози од кинеската вакцина. Масовната вакцинација стартува денеска во 10 часот и имаме закажано над 600 термини. Наредните денови вакцинацијата ќе почува во осум часот и ќе трае до 19.30, а дневно ќе има околу 1.000 термини. Вакцинацијата ќе се врши на шест пунктови и ќе бидат запазени сите протоколи“, изјави д-р Снежана Јовановска, раководител на Одделението за вакцинација во Здравствен дом Куманово.

Таа ги информира граѓаните дека вакцинацијата ќе се одвива во спортската сала во училиштето „Перо Наков“ во населбата Бедиње, а не во центарaлното училиште кај Градските базени, бидејќи тоа не било прецизирано во пораките, па дел од граѓаните биле збунети и не знаеле точно за која локација се работи.

Во масовната имунизација ќе се вклучат и волонтерите од општинската организација на Црвен крст. Тие во две смени ќе даваат логистичка помош и поддршка на луѓето и медицинскиот персонал.

Куманово е еден од шесте регионални центри во Македонија каде ќе се врши масовната имунизација, покрај Скопје, Штип, Кавадарци, Тетово, Охрид и Битола.

С. НИКОЛИЌ