Неколку млади архитекти, поддржани од голем број граѓани од Тетово, пред две години покренаа иницијатива Тетово конечно да добие градски парк. Тетово е единствен град во државата, а можеби и пошироко кој нема градски парк според урбанистичките пропорции. Токму затоа, оваа иницијатива беше широко прифатена од граѓаните на Тетово, но не и од градоначалникот, политичарите и од Советот.

„Иницијативата ‘Тетово сака парк’ предлагаше за просторот на поранешниот Монопол да се изменат Генералниот и Деталниот урбанистички план и да се утврди намена Д – паркови и зеленило. Ваква одлука носи Советот на Општината и за таа постапка ќе беа потрошени 0 денари“, велат од Иницијативата.

Но, на една од последните седници на Советот во 2024, прифатена е промената на Деталниот урбанистички план (ДУП) и на местото каде сега се наоѓа Монополот ќе се гради станбен комплекс од 2.000 станови.

„Кон крајот на 2024 година Советот на Општина Тетово ги променил Генералниот и Деталниот урбанистички план за просторот на тетовскиот Монопол, но не за да предвиди парк, туку за да се овозможи изградба на станбени згради за околу 2.000 станови. Веднаш потоа државното земјиште е отуѓено, односно продадено на поединци за смешни 7.000 евра. Градоначалникот Биљал Касами не кажува аргумент зошто мнозинството во Советот на Општината ги изменило плановите и како тоа тој го дозволил. Апелираме до советниците, пред да биде предоцна, веднаш да се суспендираат одлуките за промена на ГУП и ДУП за просторот на тетовски Монопол и да се интензивира процесот на изработка на нов, современ Генерален урбанистички план за Тетово, процес кој е во тек, но се одолговлекува“, велат од  „Тетово сака парк”.

За крајно евтината продажба на земјиштето на оваа атрактивна локација, градоначалникот Касами се правда дека продажбата била извршена уште од претходната локална власт, а тој само го спроведувал законот со кој се овозможило дооформување на парцелата.

„Што се однесува до ситуацијата со приватизацијата на земјиштето кај тетовскиот Монопол, да објаснам дека тој процесот е почнат многу порано со едно решение за приватизација на тоа земјиште од 2014 година. Тогаш е приватизиран доминантниот дел од парцелата по цена многу ниска цена во споредба со пазарната. Потоа, доминантниот сопственик почнал процес на дооформување и на останатата парцела, а цената за купување на тоа земјиште се определува од Владата според намената за користење. Значи, во ваква ситуација локалната власт нема многу простор за маневрирање. Само индикативно е тоа што за толку голем и важен процес за градот, одлучувал еден шеф на регионално одделение на Управата за имотно-правни работи. Затоа ние не сме можеле да го спречиме и да го прекинеме процесот бидејќи веќе бил завршен, а нам ни остана само го довршиме“, изјави Касами за случајот Монопол.

Касами најави дека наскоро ќе почне изработка на нов ГУП за Тетово.

З. АНДОНОВ