Од денеска, посетителите на скопската Зоолошка градина можат да ги видат трите женки бели лавчиња кои се родија во март. Трите лавчиња се родија во градината после 20 години, а нивните имиња ќе се изберат според предлози од посетителите.

Како што велат од Зоолошката, лавчињата одлично напредуваат под будното око на вработените кои со професионалност и внимание се грижат мајката и малите да се безбедни и да ги имаат сите потребни услови.

„Лавчињата ја примија и првата вакцина, како превентивна мерка во ветеринарната заштита на здравјето на животните. А од денеска ќе бидат пуштени во надворешното живеалиште и посетителите за првпат ќе имаат можност да ги видат одблизу“, велат од Зоолошката градина.

Посетителите на Зоолошката  од денеска ќе можат да даваат предлози за избор на имиња на трите лавчиња. Предлозите ќе може да се ставаат во пластичните кутии кои се поставени на влезот на Зоолошката градина. Предлози ќе можат да се пишуваат и во коментар на објавата на фејсбук страницата на Зоолошката, како и на објавата на фејсбук страницата на Град Скопје.

Анкетата за именување на малите лавици ќе трае една недела, а во текот на следната недела одбраните имиња ќе бидат и јавно објавени.

А. АНТЕВСКА