Педесетина семејства од Кичево, чии домови се поплавени од вчерашните врнежи, се сместени во спортската сала „Ивандол“, соопшти Министерството за труд и социјална политика. Од увидот на терен, екипите на Министерството за труд и Центарот за социјални работи Кичево утврдиле дека се поплавени стотина куќи од Прилепска населба во Кичево.

„На семејствата што се сместени во спортската сала Ивандол обезбедено им е сѐ што им е потребно. Досега поделени се 75 пакети храна, 75 хигиенски пакети, 100 душеци, 500 кебиња и 100 пара обувки. По завршениот увид Центарот за социјални работи од Кичево ќе излезе со конечна и официјална бројка на поплавени. Заедно со центарот за социјални работи од Кичево и со Црвениот крст ќе ја следиме состојбата и ќе ја дадеме потребната помош и поддршка на граѓаните’, велат од Министерството за труд и социјална политика.

Центарот за управување со кризи соопшти дека во Кичево се поплавени поголем број станбени објекти и помошни простории.

„Заедно со екипа на Општина Кичево и полиција извршен е увид на состојбата, и закажан е состанок во Општина Кичево на кој ќе учествуваат претставници од сите релевантни институции за да договорат активности за наредните денови. На патниот правец Р – 1305 Кичево – Битола на првиот километар има излевање на вода на патот во должина 300-400 м. На самото место поставена е соодветна сообраќајна сигнализација“, соопшти Центарот за управување со кризи.