По неколкудневната борба со огнената стихија, во која учествуваа вработените во паркот, тетовските пожарникари и два полициски хеликоптера, под контрола е ставен големиот пожар во Националниот парк Шар Планина.

„Пожарот денеска од над селото Селце се прошири и над селото Ѓермо, но до 12 часот беше ставен под контрола. Денеска во гаснењето учествуваа петмина ренџери од Националниот парк и четири лица од ДЗС“, соопштуваат од НП Шар Планина.

Овој голем шумски пожар, кој изби на 11 април, предизвика големи штети, бидејќи покрај планински ливади зафати и квалитетна букова шума.

„Периметарот на пожарот изнесуваше речиси седум километри, а изгорени се 2.019 хектари букова шума, ливади, пасишта и земјоделско земјиште, како во државна, така и во приватна сопственост“, се вели во известувањето од НП Шар Планина.

Покрај овој пожар, на подрачјето на Националниот парк вчера биле изгаснати и два помали пожара: над селото Горјане, каде што изгореле четири хектари земјиште и над селото Ломница, каде се изгорени два хектара ниска вегетација, трева и шума со даб, леска и габер.

З. АНДОНОВ