Од јавното комунално претпријатие „Водовод“ од Битола соопштија дека поради високите температури, потрошувачката на вода во водоводниот систем драстично е зголемена и надминува 700 литри во секунда.

„Како резултат на тоа, притисокот во системот е намален, што предизвикува проблеми со водоснабдувањето, особено во критичните и повисоките делови од градот“, соопштија од „Водовод“.

Оттаму апелираат за рационално користење на водата, односно да се користи само за основни потреби – пиење, лична хигиена и готвење, а граѓаните кои живеат во висококатници да ги користат своите хидрофорски постројки за обезбедување соодветен притисок.

Ж. ЗДРАВКОВСКА