Пожарот во Паркот на природата Езерани во Преспа е ставен под целосна контрола, соопшти Стојанче Ангелов директор на Дирекцијата за заштита и спасување.

„Сѐ уште на некои места има догорувања во внатрешноста на опожарениот простор, но нема опасност од негово ширење. Противпожарните екипи работат на доизгаснување на остатоците и ќе продолжат со патролирање во текот на ноќта“, рече Ангелов.

Пожарот изби пред неколку дена и вчера беше ставен под контрола, но потоа повторно се разгори. Во гаснењето учествуваше и ер-трактор од Дирекцијата за заштита и спасување, Противпожарната единица од Ресен, вработени во Паркот, во Националниот парк Галичица, од Општината и локално население.

Огнот зафати околу 300 хектари трска од заштитеното подрачје. Нема опасност по домовите на околните населени места, но загрозен е животинскиот свет во Паркот.

Во Паркот на 1.917 хектари живеат голем број ретки и загрозени растителни и животински видови поради што се наоѓа на признати светски листи за значајни подрачја. Дом е на 216 видови птици од кои дел глобално загрозени што претставува 66% од птиците на национално ниво или 42% од вкупниот број птици регистрирани во Европа. Меѓу нив и најголемата колонија на далматински пеликани. Во Езерани живеат 30 видови цицачи, безрбетници, водоземци и влечуги меѓу кои и балкански ендемити, кои се дел од природното богатство на Македонија.

Градоначалникот на Ресен Јован Тозиевски рече дека биле мобилизирани сите расположливи сили за да се изгаси огнот и се сомнева оти е подметнат.

„Уште пред недела и половина се запали во близина на селото Перово. Го изгасивме, а пред четири дена повторно вивна во Паркот. Вчера се обидовме да фатиме и еден потпалувач. Не е првпат да го палат. Ние гаснеме, а други потпалуваат. Не може да се каже точно зошто, едни за плодно земјиште, други за печурки, а трети пиромани. Битката за спас продолжува деноноќно“, вели Тозиевски.

Ж.ЗДРАВКОВСКА