„Ја заклучувам седницата и може да прогласиме дека Битола е чист град“, рече претседателката Габриела Илиевска откако во битолскиот Совет не беше изгласан предлогот од независната советничка група Поинаку за разрешување на директорот на Јавното претпријатие „Комуналец“ поради загрозување на здравјето на граѓаните.

Предлогот градоначалникот да го разреши директорот на Комуналец, го даде советникот од Поинаку, Иван Чулакоски, посочувајќи дека градот не бил никогаш погнасен, камионите за ѓубре уште течат по улиците, нема површини со нови садници, депонија на секој чекор и валкани улици.

„За“ предлогот гласаа само СДСМ и Поинаку, „против“ Коалицијата на ВМРО-ДПМНЕ, а воздржани беа Левица, ДОМ, ВМРО-Народна и Партијата на пензионерите. Додека траеше гласањето еден од советниците му свирна на друг да гласа „за“, а откако тоа го воочи претседателката на Советот Илиевска таа јавно со иронија му рече: „Џабе му свириш , чист му е градот“.

На истата седница се дискутираше и за регионалната депонија за Пелагонискиот и Југозападниот Регион што ќе се гради на територијата на Општина Новаци, во рудникот во РЕК, а каде ќе се депонира ѓубре од 18 општини. Советот изгласа да се воспостави меѓуопштинска соработка и да се формира заедничка комисија за основање на јавно претпријатие за регионално управување со отпадот. Ова беше изгласано едногласно, но Чулакоски рече дека звучи како научна фантастика.

„Научивме со годините ништо да не веруваме. Нека стои запис од денeс дека ние до 2030 година, глава ставам овде ако добиеме нов камион од државата, ќе си ги сменам и името и презимето. Сега ќе дојде лето, пак ќе течат камионите, пак ќе смрди. Научна фантастика. Ние не можеме ѓубрето низ градот да го исчистиме, регионална депонија ќе сме правеле“, рече Чулакоски.

Советниците по предлог на Илиевска побараа за 15 дена да се одржи расправа со стручни лица на која надлежните ќе го соопштат проектот за регионална депонија. Беа едногласни дека потребно е да се направи обиколница за камионите со ѓубре од сите други општини да не минуваат низ Битола на пат за Новаци.

„Целиот тој отпад што ќе се носи од запад кон југ, има само еден пат за да стигне до Новаци, мора да дојде до Битола. Ако ние сакаме да се заштитиме, а се знае дека во градот прв загадувач е сообраќајот, мора да направиме нов патен правец кон Новаци, инаку 60 товарни возила дневно ќе се движат низ Битола. Како што се движат овие од Грција со јаглен, ќе се движат уште 60 камиони со отпад. Најголемиот проблем ќе биде во Битола зашто еден е патот за Новаци, нема друг“, рече советникот од СДСМ Борче Корлевски.

Ж. ЗДРАВКОВСКА

МОЖЕ ЌЕ ВЕ ИНТЕРЕСИРА И ОВА:

СЛЕДЕТЕ ГО НАШИОТ ЈУТЈУБ КАНАЛ