Во сопственост на вработен од Општина Битола се води еден од објектите кој деновиве беше опфатен со контролите на Одделението за градежна инспекција во Битола.
„Во текот на вчерашниот ден, по допрен глас, извршен е увид и на објект во сопственост на вработен во Општина Битола. Врз основа на констатираната состојба, во моментот се врши проверка на документацијата и утврдување на евентуални неправилности. Доколку, истите бидат утврдени, ќе биде постапено согласно Закон, како што најави и градоначалникот Коњановски: Законот мора да се применува подеднакво за сите“, соопштија од Општина Битола.
Лицето на официјалната интернет страница на Општина е заведено како во раководител на инспекторат.
Објектот се наоѓа во реонот на село Дихово, а фотографија од него вчера испратија од Општина Битола во соопштението до медиумите заедно со фотографии од други објекти кои беа дел од контролата за дивоградби. На предметната парцела се гледа дека е подигната куќа и поставен е објект за базен.
Сопственикот на објектот не одговори на телефонскиот повик од САКАМДАКАЖАМ.МК ни на пораката на вибер за тоа дали за објектот кој се наоѓа на парцелата која во Агенцијата за катастар се води на негово име, има дозвола за градба и други потребни документи.
Според информациите од Катастарот, со состојба од денешен датум , односно 3 март 2025, пишува дека според имотен лист парцелата е нива и дека може да има намена за помошни објекти во земјоделството, односно фарми, а не е наведено куќа.
При истата контролата, до вечера инспекцијата покрена постапки за три големи објекти, од кои два на патот за Ниже Поле во Битола, од кои едниот како дивоградба опстојувал повеќе од десетина години, а другиот се градел без одобрение за градба. Врз основа на констатираното, согласно изготвниот записник, за нелегалните градби ќе следува решение за рушење. На третиот објект лоциран во населбата Довлеџик се монтирала голема настрешница од челична конструкција, без претходно обезбедено одобрение за монтажа, па градбата е стопирана.
Инпекцискиот надзор продолжи и денес врз пет објекти, меѓу кои и ресторани во Трново, при што еден од нив не работел неколку дена. За правен субјект во градот кој управува со повеќе објекти утврдено е дека не поседувал валидна документација за поставените настрешници кои што функционираат како ресторан со угостителска дејност и летна дискотека, но дека се чека одлука од Управен суд. Кај маркет во АРМ утврдено е дека инвеститорот не се придржувал до добиената документација. Изградбата ќе биде стопирана и ќе биде издаден соодветен налог.
Ж. ЗДРАВКОВСКА
