Ромите во Македонија денеска го одбележуваат Денот на ромскиот јазик и по тој повод добија две значајни научни дела, „Речник на ромскиот јазик“ и „Граматика на современиот ромски јазик“. Додека граматиката досега имаше неколку изданија, речникот е прво вакво дело објавено кај нас. Иницијатор на печатењето на овие две дела е Самка Ибраимовски од Партијата за целосна еманципација на Ромите.

„Денеска е Ден на ромскиот јазик и по тој повод, првпат објавуваме македонско-ромски речник, кој има над 800 страници. Покрај ова, ја објавуваме и граматиката на современиот ромски јазик. Ова е нешто ново и се надевам дека сите училишта во државата ќе ги добијат овие значајни дела. Издавањето е потпомогнато од Владата. Не треба да се заборави дека Ромите постојат во нашата држава, како заедница која не е толку развиена во однос на другите, па затоа треба да ѝ се обрне повеќе внимание. Овие две изданија се од големо значење за Ромите во Македонија, посебно за оние кои не го знаат добро ромскиот јазик“ изјави Ибраимовски.

Автори на речникот и граматиката се Фатиме и Љатиф Демири, а во изготвувањето на граматиката учествувала и Невсија Дурмуш. Според Ибраимовски, голема заслуга за создавањето на овие две дела има и Рајко Ѓуриќ, кој пред два дена починал. Тој важел за добар познавач на ромскиот јазик уште од времето на Југославија и бил еден од учесниците на првиот конгрес на Ромите во Лондон.

З. АНДОНОВ