СЕ КААМ ШТО СЕ СЛУЧИ ВАКОВ НАСТАН, РЕЧЕ БОБАН ИЛИЌ, ОБВИНЕТ ЗА ПРЕГАЗУВАЊЕ НА 4-ГОДИШНИОТ АЛМИР

    СЕ КААМ ШТО СЕ СЛУЧИ ВАКОВ НАСТАН, РЕЧЕ БОБАН ИЛИЌ, ОБВИНЕТ ЗА ПРЕГАЗУВАЊЕ НА 4-ГОДИШНИОТ АЛМИРОбвинетиот за убиство Бобан Илиќ беше донесе во судот под силно полициско обезбедување. (Фото: СДК.МК)

    Бобан Илиќ, обвинет за убиството со умисла на четиригодишниот Алмир Алиу пред Здравствениот дом во Куманово, денеска во своја одбрана пред судскиот совет кажа дека се кае што воопшто се случил таков настан. На главното рочиште во Основниот суд Куманово, Илиќ три часа го појаснуваше настанот, одговараше на прашања на одбраната, обвинителот и адвокатите и ги препознаваше учесниците во крвата пресметката во која што поради банална расправија за ред во амбуланта, животот го загуби недолжно дете.

    „Жал ми е за она што се случи. Немав намера некого да повредам, а најмалку дете. Многу ми е тешко што ме обвинуваат за убиство на мало дете. Сите знаат дека направив се да го избегнам инцидентот. Тоа што се случи беше од голем страв. Се извинувам на семејството. Се каам што воопшто се случи ваков настан“, рече денеска Илиќ

    Според Бобан, критичната вечер на 25 јуни минатата година, околу 22.30 часот, ја одвел девојката во здравствениот дом да прими инјекција. Таму се скарале со Седат Алуи, таткото на детето, кој се заканил дека ќе го фрли низ прозор и го нападнал на скалите на зградата. Бобан го повикал братот бидејќи на девојката и се слошило, а тогаш ги нападнале десетина луѓе, кои почнале да го кршат автомобилот, поради што морале да бегаат. Многу исплашен Бобан тргнал кон раскрсницата и свртел десно да побегне, но влетал во слепа улица со рампа. Откако се вратил во рикверц свртел нагло во лево, но изгубил контрола на возилото, и поради намалената видливост од скршената шофершајбна на две места, а не на едно како што покажало вештачењето, удрил во ѕид. Напаѓачите ги стигнале, брат му го извадиле од кола и почнале да го тепаат, а него го удирале по главата, вратот и телото додека тој цврсто се држел за воланот. Продолжил да вози и успејале да им побегнат на напаѓачите, по што стигнале дома. Потоа заминале во полиција каде го пријавиле случајот и дознале дека има повредено дете.

    Иако на почетокот на денешното излагање Бобан кажа дека во целост останува на изјавата што ја дал пред јавен обвинител, во текот на испрашувањето се обидуваше да го дообјасни или го менуваше исказот во однос на насоката на движење на автомобилот.

    Адвокатите на семејството Алиу, цело време настојуваа да докажат дека Бобан го прегазил детето со умисла, бидејќи во првиот исказ пред јавниот обвинител два месеци по настанот, рекол дека бегајќи од толпата со автомобил ја поминал раскрсницата и продолжил право, додека денеска тврдеше дека на раскрсницата свртел десно и се нашол во слепа улица.

    „Од она што можеше денеска да се заклучи обвинетиот се обидуваше да избегне давање на вистински исказ и она што навистина се случило. Цело време беше конфузен и нејасен. Обвинетиот може да негира, може да лаже, а може и вистината да ја каже, но едно не може да избегне дека го направил делото умислено и свесно и треба да одговара за кривичното дело убиство на свиреп начин,“ изјави адвокатот на семејтвото Алиу, Асмир Алиспагиќ.

    Бобан се пожали дека не се сеќава на сите детали во инцидентот со прецизност и точност, бидејќи бил премногу исплашен и гледал само да побегне и да спаси жива глава. Наредното рочиште е закажано во август кога ќе биде сослушан таткото и тројцата роднини на детето, кои се обвинети за насилство.

    С. НИКОЛИЌ

    Симнете ја мобилната апликација

    ©SDK.MK Крадењето авторски текстови е казниво со закон. Преземањето на авторски содржини (текстови и фотографии) од оваа страница е дозволено само делумно и со ставање хиперлинк до содржината што се цитира