Шумски пожар изби вчера попладне високо над селото Вешала во Општина Тетово, но иако веднаш биле испратени екипи од Националниот парк „Шар Планина“ не успеале да го изгаснат поради лошиот и непристапен терен и стемнувањето, па биле повлечени од теренот. Утрово пожарот сè уште е активен, а со засилување на топлиот ветер огнот се разгорел, па покрај ниската вегетација која гореше зафатил и букова шума.

Од Центарот за управување со кризи (ЦУК) велат дека од утрово се во комуникација со институциите и силите за гасење на пожарот над село Вешала, а поради високиот и непристапен терен ЦУК побара воздушна поддршка од Дирекцијата за заштита и спасување и од МВР.

„Утрово во 06,55 часот, екипа од 10 вработени (ренџери) во Националниот парк ‘Шар Планина’ од Тетово е отидеа на терен за гасење на пожарот. Од Националниот парк се бара асистенција и брза интервенција од другите надлежни институции поради тоа што ренџерите со грбни противпожарни прскалки не можеле да го локализираат пожарот. Од терен е побарана и итна воздушна поддршка од ДЗС и МВР поради неможноста пожарот да се стави под контрола, додека од РЦУК Тетово е побарано од пожарникарите од ТППЕ Тетово да пратат камион со вода за ренџерите да имаат повеќе вода за интервенција“, соопшти ЦУК.

Вчера избил пожар и во близина на селото Лисец, но тој набрзо е локализиран и изгаснат.

З. АНДОНОВ