Синоќа се запали магацин за производство на полиестер во село Неготино, Општина Врапчиште. Како што информираат од Центарот за управување со кризи, интервенирале гостиварската и тетовската пожарна, при што е повреден еден пожарникар. Тој при гасењето на пожарот паднал од скали и се здобил со повреди, поради што е однесен во Ургентниот центар во Клиничката болница во Гостивар.

„Гостиварската пожарна интервенирала со девет пожарникари и три возила. Побарана е и добиена помош од Пожарната во Тетово со четири пожарникари и едно возило. Се работи за магацин за производство на полиестер кој се состои од три објекти, при што два се целосно изгорени, а третиот делумно“, велат од ЦУК.

Пожарот е локализиран во 5:30 часот, но сѐ уште има жар и чад, поради што пожарникарите се на терен. Не се познати причините за настанување на пожарот.