Да бидат ставени на располагање на граѓаните возилата кои Општина Битола ги набави по пат на оперативен лизинг, побара советничката група на СДСМ на денешната седница на Советот. За возилата Општината ќе плати 9,9 милиони денари (oколу 160.000 евра) за четири години, а потоа ќе ги врати кај добавувачот.

Ден претходно, претседателот на битолскиот огранок на СДСМ, Методија Куновски, изјави дека добавувач на возилата е фирмата „Порше лизинг“, дел од групацијата „Порше Македонија“ каде генерален директор е роднина на министерот за надворешни работи, Тимчо Муцунски, па побара од Државната комисија за спречување на корупција (ДКСК) да ја провери постапката.

Министерот за надворешни работи Тимчо Муцунски во реакцијата до нашата редакција, неколку часа по објавениот текст, вели: „Златко Муцунски, со кого имам роднинска врска, е управител на компанијата „Порше Македонија“, но нема никаква правна поврзаност со компанијата „Порше лизинг“ која се споменува во вашата објава. Ова може лесно да се потврди преку официјалната документација достапна во Централниот регистар“.

„Во време кога не е обезбеден јавен превоз, да се потрошат 10 милиони денари за личен комодитет на општинската администрација не е дозволиво. Предлагаме да се формира работна група која ќе достави предлог до градоначалникот, да се овозможи покрај удобноста негова и на општинската админитрација овие возила да можат да се користат и од страна на граѓаните. Имаме ученици кои уште мака мачат од приградските и селските населби да стигнат до училиштата и социјално загрозени граѓани кои имаат потреба од редовни медицински третмани во болници низ државата“, рече координаторот на советниците од СДСМ Петар Николовски.

Oд компанијата каде се набавени возилата по пат на лизинг досега не добивме одговор на поставените прашање преку е-пошта – дали се точни наводите за роднинска поврзаност со владиниот функционер.

Од Општина Битола, пак, ни одговорија дека постапката за јавна набавка е спроведена согласно законската регулатива, при што Комисијата за евалуација немала обврска да навлегува во сопственичката структура на компанијата, за да утврди некаква евентуална роднинска поврзаност на некој функционер.

„Согласно објавениот оглас за спроведување на постапка за јавна набавка на 01.08.2024 година, Општина Битола, на 27.09.2024 година, склучи договор со ‘Порше лизинг Скопје’ за набавка на моторни возила преку оперативен лизинг по спроведена постапка за јавна набавка. Потписникот на договорот за ‘Порше лизинг’ е лицето Ф. С., а овие податоци лесно и едноставно може да се добијат од системот за јавни набавки. Ниту една фирма, а во случајот ниту ‘Порше лизинг’ не била ставена во повластена положба при спроведување на постапката за јавна набавка и евалуација на доставените понуди од економските оператори“, ни одговорија од Општина Битола.

Додаваат дека возилата се пристигнати, отплатата на месечните рати е почната и возилата се користат за потребите на општинската администрација при реализација на работните обврски.

• ОПШТИНА БИТОЛА ЌЕ НАБАВИ 5 НОВИ ВОЗИЛА СО ЛИЗИНГ НА 4 ГОДИНИ, ПО ИСТЕКОТ НА ДОГОВОРОТ ЌЕ Ѝ ГИ ВРАТИ НА ФИРМАТА
• ПРИСТИГНАА 4 ОД 5 ВОЗИЛА ЗЕМЕНИ НА ЛИЗИНГ, ОПШТИНА БИТОЛА МЕСЕЧНО ЌЕ ПЛАЌА ОКОЛУ 3.000 ЕВРА, А ПО 4 ГОДИНИ ЌЕ ГИ ВРАТИ КАЈ ОПЕРАТОРОТ

САКАМДАКАЖАМ.МК уште во сепетември лани објави дека Општина Битола набавува возила преку оперативен лизинг и дека по истекот на договорот и платени 160.000 евра ќе ѝ ги врати на фирмата. Станува збор за „шкода суперб Б9 селекшн“ (лимузина, најнов модел промовиран годинава во Македонија) за која месечно четири години ќе плаќа по 974,69 евра, па патничко возило од најновиот модел на „шкода октавија фи селекшн“ за која месечната рата ќе биде 656,35 евра и три помали возила „шкода фабија есенс“ по 402,27 евра или заедно 1.206, 81 евро без ДДВ. Вкупно за петте возила месечно ќе се плаќа лизинг од 2.837,85 евра или безмалку 3.000 евра. Наплатата ќе оди на фактура секој месец. Ако не се платат три месеци, операторот има право да си го земе возилото.

Од Општината и тогаш и сега соопштија дека возилата им биле стари и дека возењето со нив ја доведувало во ризик безбедноста на општинската администрација. Напоменаа дека во последните 6 години, повеќе институции во државата склучиле договори, меѓу кои и за оперативен лизинг со компанијата „Порше лизинг“, независно која политичка партија ја водела локалната или централната власт.

Ж. ЗДРАВКОВСКА