Со 22 милиони евра државни средства ќе се гради брана на реката Слупчанка во Општина Липково. Со оваа инвестиција се очекува целосно да се реши проблемот со вода за пиење и наводнување во Кумановско-липковскиот регион. Проектот се реализира преку Министерството за земјоделство, шумарство и водостопанство, а треба да заврши во рок од 4 години.

„Проектната документација е целосно готова. По две и пол години, конечно е донесена одлука да се издвојат средства од буџетот и да се гради браната преку управата на Водостопанство. Сега ќе се распише тендер за изведувач. Од самата брана дополнително ќе се гради и цевковод, со што ќе бидат опфатени околу 1.500 хектари земјиште за наводнување и ќе има дотур на постојниот систем од подружницата ‘Кумановско-Липковско Поле‘, со што ќе се обезбедат и дополнителни резервни количини вода за снабдување на градот“, изјави директорот на „Кумановско-Липковско Поле“, Оливер Илиевски.

Со новиот систем за наводнување ќе бидат опфатени земјоделските површини во Слупчане, Ваксинце, Табановце и Речица, а со него ќе стопанисува „Кумановско-Липковско Поле“.

Владата на една од претходните седници ја донесе информацијата за одобрување на тендерската постапка за изградба на брана на Слупчанка во вкупна вредност од 1.342.000.000 денари.

„Ова е најголемата капитална инвестиција што ќе се случи во Општина Липково“, информираат од Министерството за земјоделство, шумарство и водостопанство.

Идејата за изградба на брана „Слупчанка“ е датира од 1970-ите.

С. НИКОЛИЌ