Патот Македонска Каменица-Делчево ќе биде забранет за сообраќај најдоцна до понеделник, поради сериозни оштетувања на мостот на Црквенска Река. Мостот, кој се наоѓа на два километра пред Делчево од патната делница А 3 која води кон Бугарија, е оштетен по вчерашните поројни дождови, кои предизвикаа поплави во овој крај.

Од овие причини сообраќајот од и кон Бугарија наместо преку Македонска Каменица и Делчево ќе се прнасочува преку Виница, Смојмирово и Пехчево и обратно.

„Интезивно работиме на санација на оштетениот мост на Црквенска Река пред Делчево и настојуваме до утре работите да ги завршиме, но во оваа прилика сепак ќе најавам дека санацијата комплетно ќе заврши и мостото ќе биде во функција најдоцна до понеделник“,  вели директорот на ЈП„ Македонија пат“ Костадин Нацевски.

За изменетиот режим на сите делници и крстосници поставени се соодветни сообраќајни знаци и патокази со кои се пренасочува сообраќајот.

Т. ЈОВАНОВСКИ