Земјоделците, иако засега во мал број, гледаат спас за нивните проблеми преку здружувањето во земјоделските задруги. Велат дека не е исто дали како поединец ќе набавуваат репроматеријали, вештачко ѓубриво, семе или ќе настапуваат заеднички, организирано. Очекуваат со здружувањето да имат можност за подобар пласман на нивниот род директно до маркетите, со што корист ќе имаат потошувачите преку пониската цена.
Дилемата е кој е најдобриот избор, оти во социјализмот постоеја задруги кои потоа се растурија, а сега повторно има процес на окрупнување на земјоделците.
„Познато е дека сме мали, ситни земјоделци. Потоа, климатските промени силно влијаат врз земјоделието. Со мали колични род не сме интересни. Тоа здружување ни е предност во разговорите со одредени купувачи, маркети, така полесно доаѓаме до пласман. Имаме договорено средба со најголемите маркети, за директно нашите производи да ги пласираме кај нив, без посредници. Користа ќе биде и за производителите, но и за купувачите, ќе се избегнат еден или два чекори во прекупците, маржите ќе се намалат, а со тоа и цените“, вели Менде Трајковски, претседател на Македонската асоцијација на земјоделски задруги.
Преку земјоделските задруги членовите оптимистички најавуваат дека ќе го вратат животот во селата, ќе се модернизира одгледувањето на стоката и зголеми родот и приносот.
„Добивме проект од ЕУ за машинско молзење на овците, кај автохтоната овчеполска праменка. Добивме и проект за дигитален менаџмент на овчарство, најмодерна технологија, со кој преку џи-пи-ес чипови, ќе се одбележуваат лидери на овците кои го водат стадото. Така ќе го пратиме стадото каде е, ќе управувуваме со пасиштата, ако мине линија овцата ќе свири, значи влегла во туѓ имот. Така ќе го спасиме македонското овчарство, ќе го унапредиме, модернизираме, ќе го вратиме животот во селата. Тоа е нашата визија на модерен овчар. Целосна модернизација на молзењето. Да создадеме одржлив систем со технологија, иновации, да ги задржиме младите со новините од времето во кое живееме, да останат тука да живеат. За 33 години самостојна држава, загубивме два милиона овци, извезувавме милион јагниња, а сега се симнавме на 200.000“, вели Моме Младеновски, претседател на земјоделската задруга „Еко овчеполка“.
Во Македонија има околу 60 земјоделски задруги, некои се повеќе активни, други помалку. Најмногу ги има во Струмичко и Ресенско. Со новиот закон, услов за формирање задруга е минимум пет земјоделци.
„Здружувањето за нас јаболкарите значи подобра понуда за нашиот род по повисока цена. Организирано наводнување за нас е посебно значајно, да се знае ден, час, точен календар за една сезона, да не водиме грижа во тој дел како корисници, потоа набавка на материјали за заштита и ѓубрива по пониски цени, осигурен пласман на родот“, вели Љубе Пампулевски од земјоделската задруга „Крани“.
Изминатиот период, ЕУ со 260 илјади евра помогна осум земјоделски задруги во Македонија во нивната работа. Од Министерството за земјоделие најавија дека работат на промена на законите, по што државата ќе ја покрива платата на членовите на земјоделските задруги до 60 отсто, а набавката на опрема во задругата ќе се субвенционира од државата до 90 отсто. Македонската асоцијација на земјоделски задруги во Велес одржа трибина на оваа тема за финансиска поддршка на земјоделските задруги во Македонија.
П. ПЕЧКОВ
