Бистата на народниот херој Вера Јоциќ била украдена од Градскиот парк во скопската Општина Центар, соопшти од Министерството за внатрешни работи (МВР). Бистата, дело на нејзината сестра Вида Јоциќ, е поставена во почетокот на паркот на околу 150 метри од Владата на РСМ.

Според полицискиот билтен, вчера во 11:00 часот во СВР Скопје било пријавено дека од паркот е одземена спомен-бистата посветена на Вера Јоциќ. Полицијата презема мерки за расчистување на случајот и за пронаоѓање на сторителите.

Вера Јоциќ (1923–1944) била македонска партизанка и југословенски првоборец, прогласена за народен херој во 1951 година. Од крајот на 1943 година извршувала должност заменик-политички комесар во неколку партизански единици, а од февруари 1944 година и во Првиот баталјон на Третата македонска народноослободителна ударна бригада. Учествувала во Пролетната офанзива во 1944 година, при што во борбите кај селото Страцин била тешко ранета. Партизаните ја извлекле и ја носеле на шаторско крило три дена и три ноќи. По три дена, починала на 22 мај 1944 година кај селото Саса, во денешна Македонска Каменица.

Погибијата на Вера Јоциќ е опеана во песните „Очи“ и „Љубов“ на Ацо Шопов.