Битола оваа пролет е разубавена со над 25.000 сезонски цвеќиња што јавното претпријатие „Комуналец“ само ги одгледува во свои пластеници. Ова е само прва фаза од годинашниот план на Општината за зголемување на цветните површини. Ќе се засадат уште, така што, според најавите, Битола девет до десет месеци годишно ќе има цветни леи.

„Ваквото освежување се случува со заштеда од милион денари, зашто оваа година ‘Комуналец’ ги збогати капацитетите со кои располага и направи свои расади. Претходно се случуваше преку тендерски постапки да се набавуваат цветни садници за градот, но овојпат, целото цвеќе е производство на  ‘Комуналец‘“, рече градоначалничката Наташа Петровска.

На местата каде што се посадени цвеќињата за наводнување е поставен систем капка по капка.

Но, забележани се и кражби на цвеќињата. Досега се украдени околу 900.

„Намерата ни е да го прошириме пластеничкото производство следната година и да направиме нов вид на соработка со граѓаните, да им подаруваме одредена количина на оние кои се заинтересирани“, вели Панде Богоевски, директор на ЈП „Комуналец“.

Ж. ЗДРАВКОВСКА