Дојранското јавно претпријатие „Тауријан“ почна со туристички прошетки за гостите во Стар Дојран. Се организираат три тури, едната е велосипедска, за што се даваат електрични велосипеди, а другите две се пешачки по стариот дел на Дојран, но и до фронтовската линија од Првата светска војна.
Како што ни рече градоначалникот на Дојран Анго Ангов, целта е да се привлечат туристи во текот на целата година, а не само во лето.
„Нашата намера е во Дојран постојано да има гости. Како општина изминатиов период инвестиравме во пешачките и во велосипедските патеки покрај езерото, патеките од калдрма во горниот дел на Дојран, ја реставриравме турската бања, ја подигнавме Саат кулата, која е белег на ова туристичко место. Имаме инфраструктура, културно-историско богатство и одлична кујна. Како општина преку јавно претпријатие им стоиме на располагање на сите гости и посетители, да им ги понудиме убавините на Дојран, независно дали ќе бидат на еднодневна екскурзија или ќе останат повеќе“, ни рече Ангов.
Како што велат од ЈП ,,Тауријан“, првата рута е езерска, долж Дојранското Езеро, од амфитеатарот до калдрмата. Таа е со електрични велосипеди и со неколку точки за одмор, на места каде што водичите ќе ги информираат за биодиверзитетот, а од стари и искусни рибари ќе дознаат за традиционалниот начин на рибарење во Дојран.
Втората рута е пешачка, насловена „културно-историска рута“, за која изминатиов викенд имало први организирани тури. Се почнува од црквата „Св. Илија“, па туристите се шетаат по патеките од калдрмата до манастирот „Марија Магдалена“, па до Турската бања и Саат кулата и се завршува со Музејот, каде посетителите може да видат историски експонати.
Третата рута е целодневна, до фронтовската линија од Првата светска војна, за која интерес имало од посетители од Англија, Бугарија и Србија преку туроператори.
„Tокму на Фронтовската линија се наоѓа Фердинандовата чешма, воен споменик изграден од бугарската армија во 1916 година, а до неа се наоѓа спомен-плоча подигната во чест на паднатите војници од 22. Англиска дивизија и бункерите на Кала Тепе“, ни рече директорката на „Тауријан“ Роза Режак.
Овие рути беа понудени и на Саемот за туризам во Белград, со оглед на големиот број транзитни туристи од Србија. Деновиве во Дојран веќе имаше туристи кои ја прошетаа „културно-историската“ рута.
В. ТРАЈКОВ
