Започнаа, ама кратко траеја градежните работи на реконструкцијата на куќата на Аликара во Велес. На почетокот на септември се отстранија градежните скелиња кои две години беа поставени на објектот. Нешто се работело, активностите траеле неколку дена и потоа застој. Уште еден месец можат да се искористат средствата од четири милиони денари, што Министерството за култура ги доделени за санација за оваа година.

„Во тек е изработка на градежно-конструктивна фаза како дополна на конзерваторскиот проект по барање на Управата за заштита на културно наследство. По изработката и комплетирањето на документацијата, ќе продолжат работите на непосредна заштита на објектот на ул. Вера Циривири-Трена бр. 21 во Велес“, соопштија од Националниот конзерватски центар (НКЦ), кој е надлежен за санацијата на куќата стара 180 години.

На почетокот на 2024, НКЦ со годишната програма за работа доби 1,2 милиони денари од Министерството за култура, Никогаш не се објави, и покрај поставените прашања до установата, зошто тогаш не се изврши санацијата.

Куќата на Аликара е пример за старата велешка архитектура. Се наоѓа во близина на старото градско јадро Варналиите, чии куќи се исто така во лоша состојба, а една изгоре во пожар. И покрај најавите, шест години ништо не се презема за нејзина обнова, која по опожарувањето беше ветена.

• ЗАПОЧНА, ПА СЕ ПРЕКИНА САНАЦИЈАТА НА КУЌАТА НА АЛИКАРА ВО ВЕЛЕС ОТИ ИМА НОВИ ПРОБЛЕМИ СО СТАБИЛИЗАЦИЈА НА ОБЈЕКТОТ
• КУЌАТА НА АЛИКАРА ВО ВЕЛЕС СЕ РАСПАЃА, НАЦИОНАЛНИОТ КОНЗЕРВАТОРСКИ ЦЕНТАР ЛАНИ ДОБИ ПАРИ ЗА РЕКОНСТРУКЦИЈА, НО НЕ ЈА ИЗВРШИ

На средината на септември, директорот на НКЦ Александар Јордановски беше во посета на Велес и кажа дека при конзерваторско-реставраторските работи на куќата на Аликара се откриени состојби на кои треба да се интервенира.

„Деновиве се прави дополнителен проект за статичка и конструктивна стабилизација на куќата. Штом тоа заврши, ќе се продолжи со интервенцијата“, кажа тогаш Јордановски.

За куќите од Варналиите и спомен-куќата на Џинот, каде што на првиот кат се појави влага, рече дека при крајот на годината ќе дојде повторно со конкретни најави за решавање на проблемот.

Од 72 заштитени велешки куќи според архитектонското значење, колку што ги имало на списокот во 1980-тите, само уште во десетина живеат семејства и се употребливи и зачувани, а останатото е претворено во камен и прав и разрушено.

П. ПЕЧКОВ