Две возила на ЕВН Македонија ноќеска се запалени во Тетово. Едно било запалено во населбата Блок 70, а другото на улицата Иво Рибар Лола. И во двата случаја, тетовските пожарникари брзо интервенирале, ги изгаснале пожарите и не дозволиле огнот да се прошири на околните возила.
Возилата биле запалени околу полноќ (Фото: Фејсбук)
„Околу полноќ, голем број граѓани ни се јавија да пријават дека има запалени возила. Интервениравме на запалено возило на улицата Иво Рибар Лола, а потоа и во станбениот комплекс Блок 70. По кратка интервенција, пожарите се лоцирани и изгаснати“, изјави Ука Алити, командир на територијалната противпожарна единица од Тетово.
На местата каде што се запалени автомобилите увид извршиле стручни екипи на СВР Тетово.
СВР Тетово соопшти дека е приведен К. О. (43) од Тетово поради сомнение дека во периодот од 00:40 до 01:10 часот со запалива течност предизвикал пожар во патнички возила „дачија дастер“ и „нисан“, двете со скопски регистарски ознаки и сопственост на ЕВН, кои целосно изгореле. По целосно документирање на случајот, против К. О. ќе биде поднесена соодветна пријава.
За денеска попладне, активисти и здруженија од Тетово го најавија вториот протест против поскапувањето на електричната енергија од страна на ЕВН. Протестот е закажан за 18 часот на градскиот плоштад.
З. АНДОНОВ
