Мостот на реката Вардар кај Башино Село е затворен за сообраќај поради високиот водостој кој може да влијае на безбедноста на сообраќајот и на мостот. Утринава во 7,30 ч. Управата за хидрометеоролошки работи (УХМР) во Велес измери дека нивото на реката е 170 сантиметри и е за 10 повеќе од вчера.

„Сообраќајот на регионалниот патен правец Р1312 на мостот на реката Вардар кај Башино Село ќе биде времено затворен за сообраќај за сите видови на возила поради високиот водостој на реката Вардар“, кажа Центарот за управување со кризи (ЦУК) кои ја пренесувајќи информација од ЈП „Македонија пат“.

Од УХМР предупредуваат дека високиот воден бран попладнево треба да мине низ Велес.

„Значително е висок водостојот на река Вардар по целото нејзино течение, од горниот дел во Полошката Котлина, во градот Скопје и низводно накај Велес во средниот и долниот дел од сливот во Демир Капија и Гевгелија. Во текот на денот се очекува и понатаму да остане висок водостојот, посебно во средниот и долниот дел од сливот каде би се префрлил водниот бран“, соопшти УХМР.

Нема детали до кога ќе трае забраната. На мостот се вршеше санација, опшивка на надворешните носачи од мостот кој поради дотраеност беше и затворен за сообраќај два месеца.

П. ПЕЧКОВ