Për të caktuar një operacion, pacientët që kanë nevojë për ndërhyrje urgjente apo ata që presin me muaj të tërë për operacion në një institucion shëndetësor publik, duhet patjetër të kryejnë një test për KOVID-19. Megjithatë, ata nuk mund të testohen përmes sistemit shtetëror të Institutit të Shëndetit Publik pa pagesë, por nëse duan të operohen, do të duhet të testohen në spitalet private ose laboratorët privatë dhe të paguajnë nga 4,000 deri në 6,000 denarë.
Ministri i Shëndetësisë, Venko Filipçe, kur u pyet nga SAKAMDAKAZAM.MK se pse pacientët të cilëve u kërkohet të bëjnë një test për koronavirusin, nuk mund të testohen nga shteti dhe duhet të paguajnë privatisht, tha se kjo çështje është diskutuar dhe së shpejti do të ketë një zgjidhje.
Sidoqoftë, përkundër pretendimeve të Filipçes që pacientët nuk duhet të paguajnë për një test privatisht, prindërit e një djali 14-vjeçar, i cili të premten theu krahun në disa vende dhe nga spitali lokal u dërguan në Qendrën Klinike në Shkup për shkak të seriozitetit të lëndimit, thonë se janë akoma në pritje të operacionit sepse nuk ka teste për koronavirus.
Sipas prindërve, fëmija u pranua në Qendrën e Urgjencës me dhimbje të madhe, ku kreu të gjitha analizat, por jo edhe testin për koronavirusin. Mjekët u thanë prindërve se një çështje urgjente si kjo me thyerje të rëndë të eshtrave që dukej sikur të ishte prerë me sëpatë, duhet të operohet menjëherë.
Ata fillimisht u thanë që testi do të kryhej atje, nën përgjegjësinë e Klinikës. E më pas u thanë se nuk mundet, pastaj përsëri se mundet, e më në fund edhe një herë se nuk mundet. Kështu kaloi e gjithë fundjava. Përfundimisht, kirurgu u tha se fëmija nuk mund të testohet nën përgjegjësinë e shtetit, dhe se duhet që testin e detyrueshëm ta bëjë në ndonjë prej klinikave private. Fëmija nuk u pranua në Klinikë dhe u dërgua në shtëpi me terapi për lehtësimin e dhimbjes. Meqenëse nuk jeton në Shkup, nëna bashkë me djalin qëndrojnë te disa familjarë në pritje të telefonatës nga spitali, ndërkohë që kanë bërë testin e koronavirusit në një spital privat për ta përshpejtuar operimin. Nëse testi del pozitiv, edhe pse ata shpresojnë që jo, sepse familja vjen nga një qytet ku nuk ka raste aktive të regjistruara të KOVID-19, djali do të duhet t’i nënshtrohet operacionit në “8 Shtator”.
“Dhimbja u qetësua dhe më pas djalit iu shfaq kruajtja.” Kam frikë se mos rritet vendi i dëmtuar. Kam frikë mos është qelbur. Tërë ditën e shikoj këtë telefon, duke pritur një rezultat nga klinika private ku bëmë testin e koronavirusit me paratë tona. Shpresoj që kjo telfonatë të vijë këtë pasdite. Shpresoj që ta operojnë menjëherë”, tha prindi i shqetësuar i fëmijës. Ai thotë se nëse do të na kishin thënë menjëherë se duhet të bënim vetë testin, do ta kishim bërë atë tri herë deri më tani. “Kaq mund të paguajmë. Për operim në spital privat, nuk kemi.”
Në një rast tjetër, një paciente nga Shkupi me gurë në tëmth, e cila ka pritur një muaj e gjysmë për një takim për kirurgji, i tha SAKAMDAKAKAZAM.MK se për të kryer ndërhyrjen në Klinikën për sëmundje kirurgjikale “Sv. Naum Ohridski”, duhet të tregohet testi negativ ndaj koronavirusit. Për shkak se në spital nuk ka një pikë testimi, ai duhet të testohet në laboratorët e tjerë.
Por kur ka shkuar te mjeku i saj i familjes për të bërë një takim për një test përmes sistemit “Moj termin”, i kanë thënë se sipas udhëzimeve të marra nga Ministria e Shëndetësisë, pacientët pa simptoma, pavarësisht se kanë bërë operacion, nuk duhet të caktojnë testime në Institutin e Shëndetit Publik ose përmes ekipeve të lëvizshme. Pas një muaj e gjysmë pasi të shtunën kishte pasur dhimbje të forta në tëmth, kishte caktuar termin për operim në laboratorin privat duke paguar privatisht.
Edhe pse kjo nuk është një emergjencë, ekziston rreziku i komplikimeve. Pacientja thotë se ka dhimbje çdo ditë, por i është dashur të presë kaq gjatë për operacion pasi nuk është rast urgjent. Nëse rezultatet e testit janë pozitive, atëherë do të duhet të presë një operacion në spitalin “8 Shtator” dhe të përsërisë edhe njëherë të gjithë procedurën.
Ministri i Shëndetësisë Venko Filipçe beson se testimi duhet të bëhet nga vetë spitali.
“Jo, pacientët absolutisht nuk duhet të paguajnë privatisht. Folëm që testimi të kryhej nga vetë spitali ose përmes sistemit ‘Moj termin’ dhe një modul i tillë do të instalohet shumë shpejt”, tha Ministri Filipce në konferencën e djeshme për shtyp.
Klinikat dhe spitalet ende nuk kanë filluar ekzaminimet dhe operacionet për pacientët e rregullt. Vetëm urgjencat pranohen, por pacientë të tillë drejtohen nga një spital në tjetrin, duke dëshmuar vazhdimisht se kush është pozitiv e kush, negativ.
Ministri Filipçe, pothuajse në çdo konferencë për shtyp, kur e pyesin gazetarët se kur spitalet do të fillojnë të operojnë dhe marrin pacientë të rregullt, thotë se kjo do të ndodhë së shpejti dhe se janë duke punuar për këtë çështje. Por për më shumë se tre muaj nuk ka pasur ekzaminime apo operacione për pacientë të rregullt. Përkundrazi, me fluksin e pacientëve të rinj nga COVID-19, gjendja bëhet edhe më kritike. Klinikat kirurgjikale marrin vetëm urgjenca dhe ndërhyrje onkologjike, kështu që Spitali i vjetër i Qytetit, qendra e kirurgjisë në qendër të qytetit është e stërmbushur me pacientë, ndërsa Spitali i vjetër Ushtarak, “8 Shtatori” praktikisht është hequr krejtësisht nga përdorimi për pacientët e rregullt, sepse funksionon si një klinikë paralale infektive dhe qendër për testime të KOVID-19.
А. ANTEVSKA – S. K. DELEVSKA
