Почина актерот и мајстор на боречки вештини Чак Норис. Имаше 86 години. Норис, како што соопшти неговото семејство, починал ненадејно вчера.
„Иако би сакале околностите да ги задржиме приватни, знајте дека беше опкружен со своето семејство“, изјави семејството во соопштение објавено на социјалните мрежи.
Неговите улоги во акциони филмови и ТВ-серии како „Вокер, тексашки ренџер“, „Исчезнати во акција“ и „Делта одред“, го направија икона за строг човек, предизвикувајќи интернет пародии, но и обожување од претседатели.
Пред да стане ѕвезда во акциони филмови и на телевизија, Норис беше исклучително успешен во натпреварувачките боречки вештини. Тој стана шесткратен светски шампион во професионално карате средна категорија. Исто така, ја основа својата корејско-базирана американска школа за карате позната како чун кук до. Списанието „Блек белт“ му припиша црн појас десетти дан, највисоката можна чест.
Роден како Карлос Реј Норис во Рајан, Оклахома, на 10 март 1940 година, тој пораснал во сиромаштија. На 12-годишна возраст, се преселил со семејството во Торенс, Калифорнија, и по завршувањето на средното училиште се приклучил на американските воздухопловни сили во 1958 година. За време на распоредувањето во Кореја, тој започнал да тренира боречки вештини, вклучувајќи џудо и танг су до. Откако бил почесно отпуштен во 1962, работел како службеник во „Нортроп еркрафт“ и аплицирал за полицаец, но бил ставен на листа на чекање. Во меѓувреме, отворил студио за боречки вештини, кое се проширило во синџир, а меѓу учениците биле ѕвезди како Боб Баркер, Присила Пресли, Дони и Мари Осмонд и Стив Меквин, на кого подоцна му се припишува заслугата за охрабрувањето да се занимава со глума.
Норис го имаше своето филмско деби како телохранител во филмот од 1968 „Екипа за рушење“, во кој имаше и борба со Дин Мартин, но не беше потпишан со име на шпицата. Се сретнал и со Брус Ли во круговите за боречки вештини. Нивното пријателство – понекогаш како спаринг партнери – доведе до славната борба во филмот од 1972 „Враќање на змејот“, во кој Ли се бори и го убива ликот на Норис во Колосеумот во Рим. Понатаму глумеше во над 20 филмови, како „Исчезнати во акција“, „Делта одред“ и „Другари“. Во 1993 година, тој ја доби својата најпозната улога, како полицаец кој се бори против криминалот во ТВ-серијата „Вокер, тексашки ренџер“. Серијата се емитуваше девет сезони, а во 2010 година, тогашниот гувернер Рик Пери му ја додели титулата почесен тексашки ренџер. Сенатот на Тексас подоцна го прогласи за почесен Тексашанец.
