Вечерва во 20 часот во Музејот на Северна Македонија, ќе се отвори изложбата „Африка во Македонија“, а автори се доц. д-р Гоце Наумов и проф. д-р Никос Чаусидис.
Од Музејот велат дека ќе бидат презентирани повеќе археолошки, етнолошки и уметнички експонати, како и архивски материјали што ги истакнуваат културните, историските, религиските и политичките врски помеѓу овие навидум далечни простори. Исто така ќе бидат претставени повеќе африкански ракотворби и фотографии од личните колекции на Мирослав Масин, Роберт Смилески, Јасмина Никуљска, Петар Јовановски, Кристина Бицева, Билјана Јурукоски, Филип Кондовски и Скопскиот џез фестивал.
„Изложбата е од единствен карактер бидејќи за прв пат на едно место се прикажува исконската поврзаност помеѓу Македонија и Африка, која започнува во предисторијата и трае до денес“, велат авторите.
Изложбата се реализира во соработка помеѓу Музејот на Северна Македонија и Археолошкиот музеј, Завод за заштита на спомениците на културата и музеј – Охрид, Музеј на Град Скопје, Завод за заштита на спомениците на културата и музеј – Битола и Национална установа Стоби.
