„Кајмак“, седмиот игран филм на Милчо Манчевски, ќе има светска премиера на 26 октомври на Меѓународниот филмски фестивал во Токио (ТИФФ). Филмот ќе биде дел од официјалната конкуренција, со што ќе се бори за награди, а ќе има три проекции во рамките на фестивалот.
ТИФФ е еден од фестивалите од А-категорија и ова ќе биде негово 35. издание. Почнува на 24 октомври, а втората проекција на „Кајмак“ е закажана за 29 октомври. Со жирито ќе претседава американската режисерка и авторка Џули Тејмор, а Манчевски ќе одржи и мастерклас за јапонските студенти и публика.
„Македонија до Токио! Филмот добива прекрасен старт на својот живот и сигурен сум дека ќе има богат фестивалски живот и понатаму. Многу скоро по светската премиера ќе го донесеме и дома, веројатно во средина на ноември“, кажа македонскиот копродуцент Јане Ќортошев.
Манчевски, кој е многу популарен во Јапонија, беше првиот македонски автор кој ги проби границите за македонскиот филм и во Азија. Во 1995, Јапонија за првпат виде македонски филм. Манчевски беше во селекцијата на Токио уште со „Пред дождот“ и со „Прашина“, а сите негови филмови се исклучително почитувани. Всушност во Азија, не само македонската кинематографија, туку и името Македонија, како и нејзиното место на светската мапа се директно поврзани со филмовите на Манчевски.
„Кога првиот пат бев во Токио го држев во раце Златниот лав од Венеција на Куросава (за „Рашомон“) и видов дека дизајнот на Лавот се разликува од мојот – организаторите во Венеција ја промениле формата на трофејот во тие 30-тина години што поминале. Сега одам да проверам дали е сè во ред со Лавот од Токио“, рече Манчевски.
„Кајмак“ е копродукција на Македонија, Данска, Холандија и Хрватска, МРТВ е копродуцент, а поддршка доби и од европскиот фонд Еуримаж. Во екипата се вклучени филмски работници од Англија, Италија и Србија.
„‘Кајмак‘ е црна комедија, безобразна трагедија која се случува во денешно Скопје, но може да се случува каде било. Имавме неверојатна екипа, а глумците беа повеќе од светско ниво. Мотото на филмот е ‘За танго се потребни тројца‘, а останатото ќе го видите наскоро“, кажа Манчевски, по чие сценарио е снимен филмот.
Во филмот кој се снимаше во Скопје играат Камка Тоциновски, Сара Климоска, Александар Микиќ, Ана Стојановска, Симона Спировска, Петар Мирчевски, Филип Трајковиќ, Сашка Димитровска, Лазе Манасковски, Јасмина Василева, Дејан Лилиќ, Елена Кузманов, Крсте Роџевски, Ана Димитрова, Никола Ристески, Ангела Димитрова, Соња Михајлова, Александра Пешевска, Ѓорѓи Јолевски, Љиљана Богојевиќ, Сара Станиќ и други.
На прес-конференцијата беше и министерката за култура, Бисера Костадиновска-Стојчевска која рече, „Денес, Милчо Манчевски повторно нè носи во Јапонија со неговиот најнов филм, ‘Кајмак’. Во меѓувреме светот дозна за Македонија преку неговите филмови. Тие ги пренесоа на сите континенти, во стотина земји, убавините на нашата земја, ама – уште поважно – вредноста на македонската култура и македонскиот јазик“.
Данска копродуцентка на „Кајмак“ е Мета Луис Фолдагер Соренсен, холандски копродуценти се Изабела Депевег и Елс Вандерворст, хрватски копродуцент е Синиша Јуричиќ, а извршен продуцент е Иан Прајор од британската „Скала Продакшнс“.
Македонски продуцент на филмот е „Банана филм“. Продукциски дизајнер е Дејвид Манс од Англија, директор на фотографија Данецот Улрик Боел Бенцен, монтажер Емил Нунинга, дизајнер на звук Херман Пиете, кастинг директорка Милка Анчевска, костимографка Жаклина Крстевска, а дизајнер на шминка е италијанската легенда Марио Микисанти. Музиката е на „Дејниш стринг квартет“ и Игор Василев-Новоградска.
Г. КОНЕВ
