Кинотека на Северна Македонија ќе им оддаде почит на неодамна починатите филмски автори Гордан Михиќ и Стефан Сидовски-Сидо, прикажувајќи неколку нивни филмови во својата програма за септември.

Михиќ беше еден од најплодните сценаристи во поранешна Југославија, автор на низа популарни филмови и ТВ-серии и Кинотеката ќе ја одбележи неговата смрт со три македонски филма, на коишто тој има работено: „Среќна нова ‘49“ на Столе Попов, „Контакт“ на Сергеј Станојковски и „Деца на сонцето“ на Антонио Митриќески.

Професорот Сидовски, кој беше голем пријател на Кинотеката и еден од нејзините најредовни посетители, со децении важеше за неформален учител на млади филмофили и самиот снимаше аматерски и експериментални филмови и дел од нив ќе бидат прикажани во текот на септември.

Почетокот на септемвриската сесија е резервиран за фестивалот на документарни музички филмови Скопје синема сити, а ќе можат да се проследат и два циклуса од националните кинематографии на Бразил и Русија.